.jpg)
புதுடெல்லி: இந்தியாவில் செல்போனுக்கு வரும் அழைப்புகளில், அழைப்பவரின் பெயரும் தொலைபேசி எண்ணுடன் சேர்த்து காட்டும் புதிய நடைமுறை நவம்பர் 1, 2026 முதல் அமலுக்கு வர உள்ளது. இதற்கான உத்தரவை மத்திய தொலைத்தொடர்புத் துறை (DoT) அனைத்து தொலைத்தொடர்பு நிறுவனங்களுக்கும் பிறப்பித்துள்ளது.
தற்போது அறிமுகமாகவுள்ள CNAP (Calling Name Presentation) என்ற சேவையின் மூலம், செல்போனுக்கு அழைப்பு வரும்போது அழைப்பவரின் பெயர் திரையில் தோன்றும். இதற்காக தனியாக Truecaller போன்ற செயலிகளை பதிவிறக்கம் செய்ய வேண்டிய அவசியமில்லை.
தொலைத்தொடர்பு நிறுவனங்களிடம் உள்ள வாடிக்கையாளரின் பதிவு விவரங்களின் அடிப்படையில், சேமிக்கப்படாத உள்நாட்டு எண்களில் இருந்து அழைப்பு வரும்போது பெயர் காட்டப்படும். ஏற்கெனவே அந்த எண்ணை தொடர்பு பட்டியலில் சேமித்திருந்தால், அந்த பட்டியலில் உள்ள பெயரே திரையில் தோன்றும்.
எந்தெந்த செல்போன்களில் இந்த வசதி?
முதற்கட்டமாக 4G மற்றும் அதற்கு மேம்பட்ட தொழில்நுட்பங்களை பயன்படுத்தும் மொபைல் நெட்வொர்க்குகளில் இந்த சேவை அறிமுகப்படுத்தப்படுகிறது. 2G, 3G மற்றும் லேண்ட்லைன் சேவைகளில் இதை நடைமுறைப்படுத்துவது குறித்து தனியாக பரிசீலிக்கப்படும் எனத் தெரிவிக்கப்பட்டுள்ளது.
மோசடி அழைப்புகளைக் கட்டுப்படுத்த உதவுமா?
வங்கிக் கணக்கு விவரங்களைக் கேட்டு ஏமாற்றுவது, போலியான அடையாளங்களில் இருந்து அழைப்பது, தேவையற்ற வணிக அழைப்புகள் போன்ற பிரச்சினைகளைக் கட்டுப்படுத்துவதில் இந்த நடைமுறை உதவும் என எதிர்பார்க்கப்படுகிறது.
இருப்பினும், திரையில் பெயர் தெரிவதால் மட்டும் அழைப்பு நம்பகமானது என்று உறுதியாகக் கருத முடியாது. எனவே, வங்கி விவரங்கள், OTP, கடவுச்சொற்கள் போன்றவற்றை தொலைபேசி அழைப்புகளில் பகிராமல் இருப்பது அவசியம்.
வெளிநாட்டு அழைப்புகளுக்கு என்ன நடைமுறை?
சேமிக்கப்படாத சர்வதேச எண்ணிலிருந்து அழைப்பு வந்தால், அழைப்பவரின் பெயருக்குப் பதிலாக “International Call” எனக் காட்டப்படும். மேலும், அழைப்பவரின் அடையாளத்தை மறைக்கும் CLIR வசதியைப் பயன்படுத்துவோருக்கு பெயர் காட்டப்படாது என அறிவிக்கப்பட்டுள்ளது.
மொத்தத்தில், நவம்பர் 1 முதல் அறிமுகமாகும் இந்தப் புதிய நடைமுறை, அழைப்பவரை அடையாளம் காண்பதை எளிதாக்குவதோடு, தொலைபேசி மோசடிகளைக் குறைப்பதற்கான கூடுதல் பாதுகாப்பு நடவடிக்கையாக அமையும் என எதிர்பார்க்கப்படுகிறது.