.jpeg)
சென்னை: தென்னிந்திய திரைப்பட தொழிலாளர்கள் சம்மேளனம் (FEFSI) தலைவராக திரைப்பட இயக்குநர் ஆர்.கே. செல்வமணி 5வது முறையாக தேர்வு செய்யப்பட்டுள்ளார்.
தமிழ் திரைப்படத்துறையில் பணியாற்றும் பல்வேறு தொழில்நுட்ப கலைஞர்கள் மற்றும் தொழிலாளர்களை உள்ளடக்கிய முக்கியமான அமைப்பாக பெப்சி (FEFSI) செயல்பட்டு வருகிறது. பல்வேறு திரைப்படத் தொழிலாளர் சங்கங்கள் இந்த சம்மேளனத்தின் கீழ் செயல்பட்டு வருகின்றன.
ஆர்.கே. செல்வமணி கடந்த 2017ஆம் ஆண்டு முதன்முறையாக பெப்சி தலைவராக தேர்வு செய்யப்பட்டார். அதன்பின்னர் திரைப்படத் தொழிலாளர்களின் நலன், ஊதியம், பணிச்சூழல் மற்றும் பாதுகாப்பு உள்ளிட்ட பல்வேறு விவகாரங்களில் தொடர்ந்து குரல் கொடுத்து வந்துள்ளார்.
திரைப்படப் படப்பிடிப்பு தளங்களில் தொழிலாளர்களின் பாதுகாப்பை உறுதி செய்ய வேண்டும் என்பதையும் செல்வமணி தொடர்ந்து வலியுறுத்தி வருகிறார். குறிப்பாக படப்பிடிப்புகளில் விபத்துகள் ஏற்படாமல் உரிய பாதுகாப்பு நடவடிக்கைகள், காப்பீடு மற்றும் அடிப்படை மருத்துவ வசதிகள் இருக்க வேண்டும் என அவர் முன்வைத்துள்ளார்.
2026ஆம் ஆண்டிலும் பெப்சி தலைவராக அவர் தொடர்ந்து செயல்பட்டு வருகிறார். ‘ஜனநாயகன்’ திரைப்படம் தொடர்பான இணையதள கசிவு சர்ச்சையிலும் பெப்சி சார்பில் செய்தியாளர்களை சந்தித்து விளக்கம் அளித்திருந்தார்.
இந்நிலையில், தற்போது நடைபெற்ற தேர்தலில் 5வது முறையாக பெப்சி தலைவராக ஆர்.கே. செல்வமணி தேர்வு செய்யப்பட்டிருப்பது, திரைப்படத் தொழிலாளர் அமைப்பில் அவரது தொடர்ச்சியான தலைமைக்கு கிடைத்துள்ள அங்கீகாரமாக பார்க்கப்படுகிறது.