சென்னை: கரூர் கூட்ட நெரிசல் சம்பவம் தொடர்பாக வெளியிட்டதாகக் கூறப்படும் கருத்துகள் சர்ச்சையை ஏற்படுத்திய நிலையில், நக்கீரன் இதழின் ஆசிரியர் நக்கீரன் கோபால் மீது சென்னை சைபர் குற்றப்பிரிவு போலீசார் வழக்குப் பதிவு செய்துள்ளனர்.
சமூக வலைதளங்கள் மற்றும் யூடியூப் தளங்களில் வெளியிடப்பட்ட வீடியோவில், பொதுமக்களிடையே தவறான தகவல் பரப்பும் வகையிலும், அவதூறு ஏற்படுத்தும் வகையிலும் கருத்துகள் வெளியிடப்பட்டதாகக் கூறி இந்த நடவடிக்கை எடுக்கப்பட்டுள்ளதாக போலீஸ் தரப்பில் தெரிவிக்கப்பட்டுள்ளது.
இந்த வழக்கு தொடர்பாக போலீசார் ஆதாரங்களை ஆய்வு செய்து விசாரணையை தொடர்ந்து நடத்தி வருகின்றனர். இதன் ஒரு பகுதியாக நக்கீரன் கோபாலிடம் விசாரணை நடத்தப்படலாம் என்றும், சட்டப்படி தேவையான அடுத்தகட்ட நடவடிக்கைகள் மேற்கொள்ளப்படும் என்றும் தகவல்கள் வெளியாகியுள்ளன.
இதற்கிடையில், நக்கீரன் கோபால் கைது செய்யப்பட்டதாக அதிகாரப்பூர்வ உறுதிப்படுத்தல் இதுவரை வெளியாகவில்லை. வழக்கு பதிவு செய்யப்பட்டிருப்பது உறுதி செய்யப்பட்டுள்ள நிலையில், கைது குறித்த தகவல்களுக்கு போலீஸ் தரப்பில் அதிகாரப்பூர்வ அறிவிப்பு எதுவும் வெளியிடப்படவில்லை.
இந்த விவகாரம் அரசியல் வட்டாரங்களிலும், சமூக வலைதளங்களிலும் பரபரப்பை ஏற்படுத்தியுள்ளது. வழக்கின் அடுத்தகட்ட முன்னேற்றம் குறித்து அனைவரின் கவனமும் திரும்பியுள்ளது.