தூத்துக்குடி: முதல்வர் விஜய் குறித்து அவதூறாக பேசியதாக புகார் எழுந்ததை தொடர்ந்து விளாத்திக்குளம் சட்டமன்ற உறுப்பினர் G.V. மார்கண்டேயன் திங்கள்கிழமை அதிகாலை கைது செய்யப்பட்டு பாளையங்கோட்டை மத்திய சிறையில் அடைக்கப்பட்டார்.
கடந்த ஜூலை 18-ம் தேதி கோவில்பட்டி கிருஷ்ணன் கோவில் மைதானத்தில் நடைபெற்ற DMK பொதுக்கூட்டத்தில் பேசிய மார்கண்டேயன், முதல்வர் விஜய் மற்றும் அரசுக்கு எதிராக அவதூறான மற்றும் அச்சுறுத்தும் வகையில் பேசியதாக குற்றம் சாட்டப்பட்டது.
"சட்டமன்றம் கூட்டினால் உங்க எலும்புகள் கூட மிஞ்சாது" எனவும், "DMK MLA-க்கள் உங்க எலும்புகளை உடைத்து அனுப்புவோம்" எனவும் அவர் பேசிய வீடியோ சமூக வலைதளங்களில் வைரலானது.
இதையடுத்து ஆளுங்கட்சியான தமிழக வெற்றி கழகத்தின் நிர்வாகி P. காசிராம் அளித்த புகாரின் பேரில், பாரதிய நியாய சன்ஹிதா சட்டத்தின் 3 பிரிவுகளின் கீழ் விளாத்திக்குளம் காவல்துறையினர் வழக்கு பதிவு செய்தனர்.
திங்கள்கிழமை அதிகாலை விளாத்திக்குளத்தில் உள்ள அவரது வீட்டில் வைத்து போலீசார் கைது செய்தனர். கைது செய்ய வந்த போலீசாரை ஆதரவாளர்கள் தடுத்து சாலை மறியலில் ஈடுபட்டதால் சிறிது நேரம் பரபரப்பு ஏற்பட்டது. பின்னர் போலீசார் பேச்சுவார்தை நடத்தி மார்கண்டேயனை தூத்துக்குடி SP அலுவலகத்திற்கு அழைத்து சென்று விசாரணை நடத்தினர்.
விசாரணைக்கு பிறகு நீதிமன்றத்தில் ஆஜர்படுத்தப்பட்ட அவரை, நீதிபதி *பாளையங்கோட்டை மத்திய சிறையில்* அடைக்க உத்தரவிட்டார்.
குறிப்பு: தூத்துக்குடி மாவட்டத்தில் சில வாரங்களுக்கு முன்பு திருச்செந்தூர் தொகுதி முன்னாள் அமைச்சர் அனிதா R.ராதாகிருஷ்ணனும் இதே போன்ற வழக்கில் கைது செய்யப்பட்டது குறிப்பிடத்தக்கது. இந்த கைது நடவடிக்கையை திமுக அரசியல் பழிவாங்கும் செயல் என கடுமையாக கண்டித்துள்ளது.
பாளையங்கோட்டை சிறை: 1880-ல் கட்டப்பட்ட இந்த மத்திய சிறையில் அரசியல் கைதிகள் மற்றும் கொடுங்குற்றவாளிகள் அடைக்கப்படுவது வழக்கம்.