தீபாவளி பண்டிகைக்கு இன்னும் ஒரு சில வாரங்களே உள்ள நிலையில் மயிலாடுதுறை மாவட்டத்தில் வெடி கடைகள் விற்பனையை துவங்கி உள்ளன.  மயிலாடுதுறை நகரில் மக்கள் நெருக்கம் அதிகமாக உள்ள பெரிய கடை வீதி, காந்திஜி ரோடு, வண்டிப்பேட்டை உள்ளிட்ட பல்வேறு இடங்களில் 50க்கும் மேற்பட்ட பட்டாசு கடைகள் செயல்பட துவங்கியுள்ளன. 

தமிழ்நாட்டில் சமீபத்தில் அதிக அளவு பட்டாசு விபத்துக்கள் ஏற்பட்டுள்ள நிலையில் பட்டாசு கடைகளில் பாதுகாப்பு ஏற்பாடுகள் குறித்து மாவட்ட ஆட்சியர் மகாபாரதி திடீர் ஆய்வு மேற்கொண்டார். அப்போது பெரிய கடை வீதியில் உள்ள கடைகளில் தீயணைப்பான் இயந்திரங்கள் காலாவதியான நிலைகளும் போதிய அளவு மண் மற்றும் தண்ணீர் இல்லாமல் காலி பக்கெட்டுகளுடன் பட்டாசு கடைகள் இருப்பது தெரியவந்தது. இதுகுறித்து ஆய்வு நடத்தாதது ஏன் என்று தீயணைப்பு துறை அதிகாரிகள் மற்றும் மயிலாடுதுறை வட்டாட்சியர் ஆகியோரை சம்பவ இடத்திலேயே கடிந்து கொண்ட மாவட்ட ஆட்சியர் உரிய விதிமுறைகளை பின்பற்றாத கடைகளுக்கு அபராதம் விதிக்க உத்தரவிட்டார். 

மேலும் விற்பனையை துவங்கி சில தினங்களை ஆகும் நிலையில் ஒருநாள் கூடுதல் அவகாசத்தில் அனைத்து பாதுகாப்பு ஏற்பாடுகளையும் சரி செய்து விடுவதாக கடை உரிமையாளர்கள் மாவட்ட ஆட்சியரிடம் கோரிக்கை வைத்தனர், இதனைத் தொடர்ந்து அவர்களுக்கு நோட்டீஸ் வழங்க உத்தரவிட்டார். நாளை ஆய்வு நடக்கும் பொழுது பாதுகாப்பு ஏற்பாடுகளை சரி செய்து விட வேண்டும் என்று அப்போது அவர்களுக்கு அறிவுரை வழங்கினார். மாவட்ட ஆட்சியரின் இந்த திடீர் ஆய்வு பரபரப்பை ஏற்படுத்தியுள்ளது.