மதுரை: சிவகங்கை இளைஞர் ஆகாஷ் டெலிசன் மரண விவகாரத்தில் புதிய திருப்பம் ஏற்பட்டுள்ளது. மதுரை உயர்நீதிமன்றக் கிளை வழங்கிய உத்தரவின் அடிப்படையில், கடந்த மூன்று மாதங்களுக்கும் மேலாக மதுரை அரசு ராஜாஜி மருத்துவமனையில் வைக்கப்பட்டிருந்த ஆகாஷின் உடலை அரசு அதிகாரிகள் முன்னிலையில் அடக்கம் செய்வதற்கான நடவடிக்கைகள் தீவிரமாக நடைபெற்று வருகின்றன. இதையடுத்து மருத்துவமனை வளாகம் மற்றும் பிணவறை பகுதியில் ஏராளமான காவல்துறையினர் பாதுகாப்பு பணியில் ஈடுபடுத்தப்பட்டுள்ளனர்.

சிவகங்கை மாவட்டம் மானாமதுரையைச் சேர்ந்த ஆகாஷ் டெலிசன், கொலை முயற்சி வழக்கு ஒன்றில் காவல்துறையினரால் கைது செய்யப்பட்டிருந்தார். கைது செய்யப்பட்ட சில நாட்களிலேயே அவர் உயிரிழந்த சம்பவம் மாநிலம் முழுவதும் பெரும் அதிர்வலைகளை ஏற்படுத்தியது.

இந்த மரணம் சாதாரண மரணமா? அல்லது காவல் துறையினர் அடித்ததால் ஏற்பட்ட மரணமா? என்ற கேள்வி அப்போது பெரிய விவாதமாக மாறியது. குறிப்பாக நீதிமன்ற நடுவர் முன்பு ஆகாஷ் அளித்ததாக கூறப்பட்ட வாக்குமூலம் பெரும் சர்ச்சையை ஏற்படுத்தியது.

அதில், காவல்துறையினர் தன்னை தாக்கியதாகவும், தனது காலை உடைத்ததாகவும் அவர் கூறியிருந்ததாக தகவல்கள் வெளியானது. இதையடுத்து பல்வேறு அரசியல் கட்சிகள், மனித உரிமை அமைப்புகள் மற்றும் சமூக ஆர்வலர்கள் இந்த விவகாரத்தில் போராட்டத்தைத் தொடங்கினர். ஆகாஷ் மரணம் காவல் மரணமாக கருதப்பட வேண்டும் என்றும், சம்பந்தப்பட்ட காவல்துறையினர் மீது கடுமையான நடவடிக்கை எடுக்க வேண்டும் என்றும் கோரிக்கைகள் எழுந்தன.

ஆகாஷ் உயிரிழந்ததைத் தொடர்ந்து அவரது பெற்றோர் மற்றும் உறவினர்கள் போராட்டத்தில் ஈடுபட்டனர். தங்கள் மகனின் மரணத்திற்கு காரணமானவர்கள் மீது உரிய நடவடிக்கை எடுக்கப்பட வேண்டும் என்றும், குற்றவாளிகள் கைது செய்யப்பட வேண்டும் என்றும் அவர்கள் வலியுறுத்தினர். மேலும், நீதி கிடைக்கும் வரை உடலை பெற்றுக்கொள்ள மாட்டோம் என்று உறுதியாக அறிவித்தனர். இதன் காரணமாக கடந்த மூன்று மாதங்களுக்கும் மேலாக ஆகாஷின் உடல் மதுரை அரசு ராஜாஜி மருத்துவமனை பிணவறையில் பாதுகாப்பாக வைக்கப்பட்டிருந்தது.

இந்த நிலையில், ஆகாஷின் தந்தை ராஜேஷ்கண்ணன் மதுரை உயர்நீதிமன்றக் கிளையில் மனு தாக்கல் செய்தார். அந்த மனுவில், தனது மகனின் மரணத்திற்கு காரணமானவர்கள் மீது கடுமையான சட்ட நடவடிக்கை எடுக்க வேண்டும் என்றும், குடும்பத்திற்கு ரூ.50 லட்சம் இழப்பீடு வழங்க வேண்டும் என்றும் கோரிக்கை விடுத்திருந்தார். அதோடு, சம்பந்தப்பட்ட காவல்துறையினர் மீது எஸ்சி - எஸ்டி வன்கொடுமை தடுப்புச் சட்டத்தின் கீழ் வழக்குப்பதிவு செய்ய வேண்டும் என்றும் வலியுறுத்தப்பட்டிருந்தது.

இந்த வழக்கை விசாரித்த நீதிபதி விக்டோரியா கௌரி, விசாரணையை விரைவாக முடித்து இறுதி அறிக்கையை தாக்கல் செய்ய வேண்டும் என்று ஏற்கனவே உத்தரவிட்டிருந்தார். இந்நிலையில் வழக்கு மீண்டும் விசாரணைக்கு வந்தபோது, மனுதாரர் தரப்பில் முன்வைக்கப்பட்ட பல கோரிக்கைகள் நிறைவேற்றப்பட்டுள்ளதாக அரசு தரப்பில் தெரிவிக்கப்பட்டது. இதையடுத்து கருத்து தெரிவித்த நீதிபதி, "இறந்தவரின் உடலை இவ்வளவு காலம் பெறாமல் இருப்பது ஏற்கத்தக்கதல்ல. இறந்தவருக்கு உரிய மரியாதை செய்யப்பட வேண்டும். பெற்றோர் உடலை பெற்றுக்கொள்ள வேண்டும்" என்று தெரிவித்தார்.

மேலும், உடலை பெற்றுக்கொள்ள மறுத்தால் அரசு மற்றும் காவல்துறை இணைந்து சட்டப்படி அடக்கம் செய்ய நடவடிக்கை எடுக்க வேண்டிய சூழல் ஏற்படும் என்றும் நீதிமன்றம் எச்சரிக்கை விடுத்தது. ஆனால் நீதிமன்றத்தின் கருத்துக்குப் பிறகும் ஆகாஷின் பெற்றோர் தங்களது நிலைப்பாட்டில் மாற்றமில்லை என்று தெரிவித்துள்ளனர். "எங்கள் மகனின் மரணத்திற்கு காரணமானவர்கள் முழுமையாக தண்டிக்கப்பட வேண்டும். எங்களுக்கு நீதி கிடைக்க வேண்டும். அதுவரை எங்களது போராட்டம் தொடரும்" என்ற மனநிலையிலேயே அவர்கள் இருப்பதாக கூறப்படுகிறது.

இந்த சூழலில், ஆகாஷின் உடலை அரசு அதிகாரிகள் முன்னிலையில் கண்ணியமான முறையில் அடக்கம் செய்ய மதுரை உயர்நீதிமன்றக் கிளை அனுமதி வழங்கியுள்ளது. அதன்படி மதுரை மாவட்ட ஆட்சியர், மாநகராட்சி ஆணையர், ராஜாஜி அரசு மருத்துவமனை முதல்வர் மற்றும் பிற அதிகாரிகள் தேவையான நடவடிக்கைகளை மேற்கொள்ள உத்தரவிடப்பட்டுள்ளது. இதையடுத்து மதுரை அரசு ராஜாஜி மருத்துவமனை பிணவறை பகுதியில் பரபரப்பான சூழல் நிலவி வருகிறது.

எந்தவித அசம்பாவிதமும் ஏற்படாத வகையில் காவல்துறையினர் அதிகளவில் குவிக்கப்பட்டுள்ளனர். மருத்துவமனை வளாகம் முழுவதும் பாதுகாப்பு பலப்படுத்தப்பட்டுள்ளது. இன்னும் சற்று நேரத்தில் ஆகாஷின் உடல் அதிகாரிகள் முன்னிலையில் பிணவறையில் இருந்து எடுத்துச் செல்லப்பட்டு அடக்கம் செய்யப்படலாம் என்று தகவல்கள் தெரிவிக்கின்றன. இதனால் மதுரை மற்றும் சிவகங்கை மாவட்டங்களில் இந்த விவகாரம் மீண்டும் பரபரப்பை ஏற்படுத்தியுள்ளது.