சிங்கப் பெண் அதிரடிப்படை துவக்க விழாவில் பேசிய முதலமைச்சர் ச. ஜோசப் விஜய், “பெண்களை தொந்தரவு செய்துவிட்டு அப்படியே தப்பித்துவிடலாம் என நினைத்தால், கடுமையான நடவடிக்கை எடுக்கப்படும்” என எச்சரித்தார்.

சிங்கப்பெண் அதிரடி படை துவக்க விழாவில் பேசிய முதலமைச்சர் ச. ஜோசப் விஜய், “பெண்களுக்கும், பெண் குழந்தைகளுக்கும் எதிரான குற்றச்செயல்கள் எல்லாம், போதைப்பொருளால் ஏற்படுகிறது” எனப் பேசி, போதைப்பொருள் வேரைப் பிடுங்க வேண்டும் எனத் தெரிவித்தார்.

தமிழ்நாடு சட்டமன்றத் தேர்தலில் வெற்றி பெற்று கடந்த 10ஆம் தேதி முதலமைச்சராக பதவியேற்ற ச. ஜோசப் விஜய், சிங்கப்பெண் அதிரடிப்படை அமைக்கும் ஆணையில் இரண்டாவதாக கையெழுத்திட்டார். தொடர்ந்து சிங்கப்பெண் அதிரடிப்படை தலைமை அதிகாரியாக ஐ.ஜி. பவானீஸ்வரி நியமிக்கப்பட்டார்.

மேலும், மற்ற படைகளில் இருந்து தனித்துக் காணப்படுவதற்காக சிங்கப்பெண் அதிரடிப்படைக்கு எனத் தனி சீருடை மற்றும் இலச்சினை உருவாக்கப்பட்டது. இந்நிலையில், இத்திட்டத்திற்கான எஸ்.பி., டி.எஸ்.பி., காவல் ஆய்வாளர்கள் மற்றும் உதவி காவல் ஆய்வாளர்கள் ஆகியோரும் நியமிக்கப்பட்டுள்ளனர்.

இந்நிலையில் இன்று எழும்பூர் ராஜரத்தினம் மைதானத்தில், சிங்கப்பெண் அதிரடிப் படை திட்டத்தை முதலமைச்சர் ச. ஜோசப் விஜய் தொடங்கிவைத்தார். இந்நிகழ்ச்சியில் பேசிய முதலமைச்சர் ச. ஜோசப் விஜய், “பெண்களுக்கும், பெண் குழந்தைகளுக்கும் எதிரான குற்றச்செயல்கள் எல்லாம், போதைப்பொருளால் ஏற்படுகிறது. போதைப்பொருள் பிரச்சனையை பல வருடமாக கண்டுகொள்ளாமல் இருந்ததால்தான் அது இந்த அளவிற்கு வேர்விட்டுள்ளது. எனவே முதலில் அந்த வேரைப் பிடுங்கி எறிய வேண்டும். இதனை செய்தாலே சட்டம் ஒழுங்கு சரியாகிவிடும்.

பெண்களை தொந்தரவு செய்துவிட்டு அப்படியே தப்பித்துவிடலாம் என நினைத்தால் அவர்களுக்கு வலிமையாக சொல்கிறேன். காவல்துறையில் இருந்து கடுமையான நடவடிக்கை எடுக்கப்படும். குற்றப்பத்திரிகை தாக்கல் உள்ளிட்டவை வேகமாக நடைபெறும். அதேசமயம், இதில் நிரபராதிகள் தண்டிக்கப்பட்டுவிடக்கூடாது என்பதை காவல்துறை மனதில் வைத்துக்கொள்ள வேண்டும்.

சிங்கப்பெண் அதிரடி படை திட்டத்திற்காக ரூ. 354 கோடி நிதி ஒதுக்கீடு செய்யப்பட்டுள்ளது. இரண்டாம் கட்டமாக சிங்கப்பெண் அதிரடி படையில் 2,500 பணியிடங்கள் உருவாக்கப்பட இருக்கிறது. பெண்களுக்கு எதிரான குற்றங்கள் நடப்பதற்கு முன்னதாகவே அதனை தடுக்க இந்த சிங்கப்பெண் அதிரடி படை செயல்படுத்தப்படும்” எனத் தெரிவித்தார்.